陳山聰「父女」升呢撻着劉穎鏇

陳展鵬、唐詩詠、陳山聰、劉穎鏇（Tiffany）等昨日在將軍澳電視城為新劇《超能使者》拜神。以貼身衫示人的陳山聰熱得胸口也濕了，他笑說：「我畀個『心心』Tiffany嘛。」陳山聰劇中與劉穎鏇演一對，兩人最多打戲，他笑說：「上次拍《大步走》佢做我個女，已經話下次就做我女朋友，點知開口中，下次佢應該做我阿媽。」

反應熱烈認抵死

講到在《十八年後的終極告白》陳山聰慘死，網民戥不值，他說：「好多網民都話睇到喊，大家有咁嘅反應，我覺得自己真係抵死。同監製提議再拍多部另類劇，希望下年可以成事。」劉穎鏇劇中飾演飛女，穿小背心襯熱褲，相當火辣出位，但就要為造型戒口。

陳展鵬講到有意簽唱片公司圓歌星夢，他說：「有兩間唱片公司傾緊，交咗畀公司經理人去處理。當年出道係歌手，有錄過歌但冇出碟就解咗約，唔止遺憾，直情係失望，希望自己有新突破。（簽唱片公司係續約TVB嘅條件？）唔會，約仲有一段時間，同公司關係良好，我簽到退休o架喇，好似修哥（胡楓）咁幾好。（簽星夢？）有機會o架，最緊要大家方向適合。」

演慣動作戲的陳山聰，孭起林子善話咁易。

陳展鵬蓄勢入樂壇，幾時又到唐詩詠呢？

唔覺陳凱琳有咗

講到在母親節預告7月會送神秘禮物給亡母，唐詩詠再強調不是結婚，只是參與慈善工作。講到有傳鄭嘉穎再做老竇，她則說：「我唔知道，有冇咁快？上次去陳凱琳嘅護膚品記者會，見佢仲好纖瘦，着住高踭鞋，唔覺得佢有咗。」鄭嘉穎老友林子善則說：「未收到風，只係知佢喺屋企『孵蛋』全職湊仔，以前大家覺得佢成日黑面，做咗老竇就慈祥好多。」