關智斌激情「慾」搏讚Ashina好放！
關智斌（Kenny）在英皇電影《墮落花》中的角色性格陰沉、複雜，並與溫碧霞、郭奕芯（Ashina）等有大膽情慾戲，雖然難度分爆燈，但他沒有被難倒，笑說：「呢幾年喺內地演過唔同角色，同以前官仔骨骨嘅形象好唔同，精神病患、古惑仔統統做過，所以我幾拋得開偶像包袱！不過我同師妹Ashina嗰場戲，拍嘅時候好多人圍住，冇乜情慾感覺，但睇完試片，我都忍唔住『嘩』咗一聲！（Ashina表現如何？）佢好放，唔會扭扭擰擰，一Roll機就拍，完全冇包袱，呢樣嘢對新人或女演員嚟講都唔簡單。」
唔會嬲張致恒
至於最喜歡一幕，他指是一場跟溫碧霞的對手戲：「我嘅角色情緒起伏好大，有場係我非常激動之後，一瞬間變番小朋友，攬住家姐（溫碧霞）扭計，呢幕我諗過好多方法去處理，所以印象好深刻。」
去年，Kenny的遭遇如坐過山車，原本於紅館開Boy'z演唱會，但因張致恒爆出「一腳踏N船」而告吹，幸好最後開到一個屬於自己的演唱會。問現在有否嬲張致恒？他說：「真係冇，過咗去，我依然當佢係細佬，冇變過。（有冇叫佢生性？）成日講，廿年前已經開始講。」