居家防疫肥5磅 周佩婷危中有機轉型KOL
政府早前推出多項防疫措施，包括關閉健身室等，令向來有做Gym習慣的無綫娛樂台新聞主播周佩婷（Angel）無所適從，更因長時間在家不停吃喝，短短兩星期已發福！她說：「除咗工作，其餘時間都盡量留喺屋企，唔覺唔覺食多咗，磅重發現重咗5磅，唔單止之前啲裙唔啱着，連上鏡都感覺多肉咗，所以開始戒澱粉質同飲蔬菜湯，感覺既健康又飽肚。」
發放正能量
除體重增加外，Angel坦言情緒亦變得低落，故決定與《東張西望》主持好友黃愷怡（Jasmin）一同拍運動片，發放正能量：「可能有啲朋友同我一樣，覺得成日喺屋企冇嘢做，冇得出街好無聊，所以我就同Jasmin諗，不如一齊運動，希望透過片段鼓勵大家喺屋企都可以約朋友一齊做。」
問是否向KOL發展？她直言有此念頭，並藉今次運動片試水溫：「我哋都諗住繼續Po啲運動片鼓勵大家一齊郁，如果今次條片反應好，有諗過遲啲拍啲生活片同開設社交平台帳戶，分享唔同嘅嘢畀大家。」
#