C君化身「鹹精靈」露肉嚇親途人
農夫成員鄭詩君（C君）在熱播劇《降魔的2.0》中扮演「資深精靈」風獅爺，自嘲身材肥腫難分，最難忘於山頂拍「脫戲」時，嚇到途人雞飛狗走：「監製想同上集一樣，因為精靈『石敢當』都係冇衫着，仲露晒股，但我嘅身形就令好多人『嘆為觀止』！拍攝嗰幾日係全年最凍，導演一叫停，即刻有人攞羽絨同熱飲畀我，好窩心。（尷尬？）頭嗰40秒可能會，但拍足14粒鐘，仲邊會諗咁多！不過相信啲途人離遠見到我，就會自動彈開好遠！」問他「除衫」前有否特意Keep Fit，他打趣說：「有，我有特登唔Keep嘅。」
唔怕形象被毀
對於今次「打戲連場」，又被安排迷戀「女神」黃智雯，用盡法力攝取對方的內衣褲收藏，演活「鹹濕精靈」可有擔心形象被毀，C君自嘲：「我又有乜形象可言？不如話反而擔心本人會破壞角色形象仲好過！」又指今次過足戲癮：「拍完我先驚覺自己拍咗套好有動畫感嘅電視劇，相信觀眾會睇得好開心，但醒起時已經竣工，惟有希望有第3輯啦，應該會更加好玩。」
