為新歌接受挑戰 Gin Lee呃老竇不孝
環球歌手Gin Lee（李幸倪）為配合新歌《敢》主題，先後接受多個挑戰，日前獻出人生第一次，透過視像通話整蠱遠在馬來西亞的爸爸，做不孝女，事前她緊張到滴汗：「從未試過呃爸爸，我諗佢唔會信，覺得佢會笑囉！」接通電話後，Gin對爸爸講唔好意思，扮先斬後奏去了紋身，希望爸爸不要嬲，李爸爸即說：「吓？你係咪傻咗？」Gin即場爆肚指在背上紋了「孝順父母」，李爸爸笑到見牙唔見眼，反問她何不紋上「精忠報國」，父女對話令人爆笑。
隔住螢幕同家人食飯
後來Gin向爸爸騷出手腕內側的咖啡杯印水紙，冧爆表示深知對方愛喝咖啡，因此刺上圖案，見啡如見人，還聲稱紋上癮，打算再添爵士鼓刺青，嚇得李爸爸出言勸阻：「你唔好呀！你想紋身？一係你生日我送畀你，想紋電飯煲？雪櫃定吸塵機？」面對幽默的李爸爸，她難忍笑意，最終向爸爸「自首」笑言只是玩笑一場，不過自爆做了更驚人的事，就是幫人紋身，李爸爸搞笑問：「邊個咁陰功呀？」她希望將來親自為父親刺青，李爸爸聽罷毫不領情：「唔好搞我，你紋媽咪啦！我冇咁嘅勇氣，你敢紋，我唔敢畀你紋呀！」
Gin透露思鄉情切，掛住在馬國的家人，以往一有時間就會飛返去：「每一年呢個時間佢哋都會過嚟，但受疫情影響，佢哋依家都唔出得街，我又唔可以返去，惟有透過視像通話，仲會隔住螢幕一齊食飯、一齊飲杯，感覺屋企人喺身邊。」