蔡思貝被胡鴻鈞搶走 余德丞：我同佢襯啲！
「陽光型男」余德丞（Dickson）與港姐出身的蔡思貝傳緋聞多時，他前年踢波時昏迷送院，對方即飛奔探望，其後又在活動上見埋女方家長。不過，隨着思貝被爆與胡鴻鈞撻着後，「余思戀」亦暫告一段落。Dickson笑言與兩人其實是好友，曾一起食飯、睇演唱會，但沒有八卦他倆的感情事。問到被思貝「飛起」可有酸溜溜？他說：「冇啦！點解會酸溜溜呀？都話兩個都係好朋友。（覺得佢哋襯唔襯？）我同佢襯啲！大把人都係咁講，我講同胡鴻鈞喎！（喺思貝手上搶胡鴻鈞過嚟？）如果我做歌手，會邀請佢同我合唱，蔡思貝唱歌唔得！」
兜百貨店識台妹
Dickson主持的旅遊節目《台北101種玩法》近日播出，問到今次拍攝可有乘機識女仔？他笑言好想有艷遇，自爆特地走到連鎖百貨店，等待專門幫單身男女配對的網紅作介紹：「點知兜咗三個圈都冇出現到！（好失望？）梗係啦！因為睇佢配對啲人好正o架嘛。（想識台妹？）做個朋友冇乜問題，下次去旅行可以帶我去玩！」
講到台妹出名溫柔、樣靚身材正，問到可符合其擇偶條件？Dickson坦言較着重內在美：「最緊要係心地善良同性格好，要夾得埋，同埋我鍾意短頭髮嘅女仔。」卻坦言接受不到異地戀：「咁遠咁辛苦，我之前中學試過，都有少少可惜同遺憾。（自此唔想再試異地戀？）梗係啦！有陰影。」