譚坤倫願望傻多次彌補遺憾
無綫藝人譚坤倫（Alan）入行以來一直演閒角居多，近日終憑處境劇《愛．回家之開心速遞》中IT宅男「CPU」一角嶄露頭角，引起網民熱議。他感謝網友喜愛，並表示拍攝時樂在其中：「CPU係我做得最開心嘅角色，每次返工都好興奮，不斷諗好多嘢玩。記得播完我第一次出場，再返劇組開工嘅時候，劇組人員都想同我影相，嗰種感覺好開心。」
此外，他期望再挑戰「傻仔」角色，讓自己有機會彌補遺憾：「我想挑戰智力有問題、或者悲慘類型嘅角色，因為最近有同事同我講，睇到《鐵馬戰車》我演一個傻仔，佢當時覺得我真係一個傻仔。但對我而言，自己做得未夠好，所以希望再有機會演繹得更好。」