擺酒撞正阿爸大壽 何雁詩：可以慳番啲
歌手何雁詩昨日一身運動Look到電台受訪，講到未婚夫鄭俊弘日前大爆9月的美國婚禮撻Q，她即「埋怨」說：「佢成日自己爆完唔同我講！見美國情況嚴峻，顧及親朋好友嘅安全，或者留番一周年再去。」
她指現階段仍計劃於香港擺酒，又自爆揀了「吉日」，實行雙喜臨門：「嗰日係爸爸70歲大壽，一齊搞可以慳番啲，哈哈！（唔怕相沖？）西曆生日啫，11月7日，佢好開心o架！本身都諗住同佢搞個大Party，既然當日叫咗佢最親嘅親友嚟，咁就一齊慶祝。」問到日後會揀慶祝結婚周年紀念日，還是與爸爸慶祝生日？她即笑說：「未必喺嗰日簽字嘅，擺酒啫！（未入紙？）未，要幾時入o架？我咩都唔識，第一次結婚咋！」笑翻全場！她續透露日前已透過PR朋友Book尖沙咀某酒店場地，將大排筵席30多圍。