蔡思貝患躁鬱症有信心撐得過

無綫藝人蔡思貝甫出道就備受力捧，但7年來一直有不少負面新聞，包括被批評演技差，而有「人肉發電機」之稱的她又有一大堆緋聞男友。性格反叛、在外國長大的思貝一開始不習慣香港生活要循規蹈矩，當時形象插水，情緒低落，加上入行初期家人不明白其工作，曾有爭執，導致她大受打擊，曾自閉在家爆喊，經常發噩夢又失眠。

直至2018年拍攝劇集《大帥哥》時，拍檔張衞健察覺到她的情緒出現問題，開口提醒她要注意並及早看醫生，她始被診斷患上躁鬱症！雖然及時就醫，但因工作忙碌，沒時間試藥，她決定自行停藥，現時靠做運動及與好友陳瀅、賴慰玲等傾心事，慢慢調節情緒，雖然仍未完全走出躁鬱症的陰霾，但有家人及朋友支持，她有信心撐過去。

只是人生小插曲

對於患上躁鬱症，正趕拍新劇《踩過界II》的思貝說：「OK嘅，都係我嘅經歷，係呢幾年入行後嘅心路歷程，躁鬱症只係小插曲，每個演員都會經歷唔同人生嘅章節，對演員嚟講係修行同靈感，所以每刻都會過得好好。（依家情況點？唔使睇醫生食藥？）OK嘅。」

對於思貝自爆患躁鬱症，緋聞男友胡鴻鈞以短訊回覆：「同佢傾偈感受到佢係個身心健康嘅女仔，同埋佢身邊有好多好姊妹，冇問題啦！」問到會否多開解對方，他笑說：「佢有需要又搵我傾嘅，我會盡力開解。」