港姐網上復活 真人騷篩佳麗

無綫big big channel昨日在將軍澳電視城舉行《2020 TVB網絡平台 疫境求新》記者會，宣布加推多元化節目包括「疫境廚神」、「經典電視劇網絡版」等，早前宣布停辦的香港小姐亦決定「復活」！

上門Set機防造假

無綫助理總經理（非戲劇製作）余詠珊表示，《2020香港小姐競選》將以網絡形式復辦，在big big channel播放，構思中會有真人騷、全民淘汰環節，網民更可在網上看到佳麗的日常生活、泳裝、化妝等。至於參選資格依舊要是香港人，亦會如常選出冠、亞、季軍殊榮，暫定五月底開始進行，初步預算挑選五、六十位靚女參選。余詠珊說：「因為疫情，我哋唔會長期集合晒啲人，初期訓練可以喺屋企個別做，希望有更多觀眾參與，大家有互動。（決賽喺翡翠台播？）考慮中，要視乎疫情。（擔心佳麗造假？）我哋有方法審核，亦會安排工作人員上門Set器材拍攝，唔係要做騎呢騷，係想做好好睇嘅節目！」

黃嘉雯想做導師

應屆港姐黃嘉雯、王菲與古佩玲亦有出席記者會，黃嘉雯認為港姐在網絡舉行很創新，以往觀眾到決賽才認識佳麗，今次可透過網絡了解佳麗真實一面：「好多新環節諗法，覺得幾好玩，我都想再參加一次，或者可唔可以做導師一齊玩。（網絡舉行，冇咗港姐高貴形象？）做電視節目要創新，同埋依家觀眾上網時間多過睇電視，反而係一個突破，畀全球更多人睇到。（唔使冧莊鬆口氣？）我好隨心，多啲成員加入香港小姐大家庭都係好事。」

王菲則認為網絡上可呈現很多電視上看不到的環節和畫面，除了靚，也可讓佳麗盡展所長。