金像獎5‧6網上公布賽果 廿分鐘完事

本屆金像獎受疫情影響嚴重打亂陣腳，「金像獎協會主席」爾冬陞（小寶）昨午透過電話接受傳媒圍訪，表示將於5月6日下午3時在各大社交平台直播，公布19項賽果，整個活動預計需時約20分鐘，屆時由他代表金像獎董事局負責主持，一切從簡。

難預計何時「補數」

他坦言今次以直播形式公布賽果，事前已作出多番考慮：「曾經考慮邀請一眾候選人『露面』，但基於涉及112位，再加上大家分布台灣及內地等，技術上需要動用大量人力，最終決定簡單去搞。一眾得獎人依家未能夠喺頒獎台上接受同業掌聲係遺憾嘅，不過佢哋得獎分量一定唔會降低。」

小寶又透露正努力籌謀，計劃明年舉辦第40屆頒獎禮前，補辦今屆頒獎禮彌補遺憾，惟詳情要待疫情過後才可落實：「得獎者如果想快啲攞到個獎，或者要嚟影相，我哋可以先彈性處理。（大約幾時補番搞頒獎禮？）暫時無法估計，但已經諗好幾個時段，考慮下屆金像獎記者會嗰時，或者下屆金獎像前一個星期六舉行。（會唔會下屆一次過頒番今屆獎座？）唔得，有需要劃分清楚。」

場刊登得獎感受

至於今屆金像獎場刊亦會延遲面世，小寶說：「希望公布賽果後，將得獎者訪問放埋入去，作為紀念。」並指政府早已撥款900多萬，資助今屆頒獎禮經費：「不過直至依家，我哋支出仍然有限，一個月前仲解散咗啲合約幫手，所以冇浪費公帑，用唔晒嘅會歸還。」據悉，香港電影金像獎舉辦至今從未出現過「缺勤」情況，對於被迫少辦一屆，業界雖然失落，但亦明白要配合大環境變通。