孖王浩信夜雨起舞張曦雯濕住嗌Hot
藝人張曦雯（Kelly）與王浩信現正忙於拍攝劇集《踩過界II》，日前到中環拍攝淋雨跳舞的戲份。身穿薄薄雪紡裙的Kelly，與浩信在雨中跳舞，既要跳起又要踢腿，難度甚高！幾日前天氣乍暖還寒，但她受訪時坦言好彩：「拍嗰陣溫度唔係好低，但都有黐暖包，拍完每一個鏡頭都有工作人員即刻遞毛巾畀我，但我都話唔使，可能跳住舞反而有啲熱。」
地下跣累NG
劇中同樣飾演失明律師的Kelly，透露二人練舞兩小時，事前都有找排舞老師練習，配合毛毛細雨，拍出來的氣氛充滿浪漫美感：「除咗盲住跳之外，劇情仲講我哋飲埋酒，傾完一輪偈先跳，所以都拍咗一段時間。（NG？）都有啊！因為地下好跣又斜，我要着住高踭鞋，同排舞時分別好大。」
至於浩信被問到拍攝上一集時，與李佳芯都有雨中跳舞一幕，當時更正值嚴寒，他說：「係呀辛苦啲！嗰陣同Ali（李佳芯）拍係得氣溫7度，今次就有17度，同埋雨勢冇咁猛，相對舒服啲。」
