廖碧兒放疫監急救甩色頭髮

雖然本地疫情有緩和迹象，但上月底於加國返港的廖碧兒，即使日前已完成14日家居隔離，並已進行病毒檢測，證實未有中招，但為求安心，她決定多留家幾天，直至昨日滿20天才出關。

「應該肥咗好多」

廖碧兒出關首項任務，就是到髮型屋扮靚，既剪髮又染色，花了兩個多小時才完成，之後去銀行處理私務，再到酒店與香港品酒師協會代表開會，認真忙碌。事後她受訪時笑言困在家中多日，加上已數月沒打理頭髮，又長又甩色，故「放監」後即去髮型屋，又稱：「記得頭一星期淨係匿喺房瞓覺同食嘢，應該肥咗好多！到最後知道結果（證實冇感染），咁啱係復活節，即刻整蛋撻、家鄉飯畀媽咪食，好彩個磅壞咗，唔知重咗幾多，依家要的起心肝減磅。」

她透露隔離期後段開始線上上課，故非常忙碌：「每朝5點起身，6點半上堂，因為要就番加拿大個時差，所以我夜晚9點就瞓，好健康。」

籌備品酒比賽

百足咁多爪的她笑言原定將拍ViuTV新劇，但因疫情而延遲，令她可騰出時間處理「業務」：「香港品酒比賽原定5月舉行，依家暫延到7月，要視乎疫情進展再作最後決定。因為我係有關成員，所以趁得閒約佢哋，傾嚟緊可以點處理。」