張景淳維護呂慧儀：以後會避嫌
緋聞情侶張景淳與呂慧儀被指在無綫化妝間VIP房密會，兩人昨日現身解畫，指入房只為拍攝洗手示範片，張景淳表示為免誤會，下次拍之前會大聲宣揚。
「長腳蟹」呂慧儀近期是非多多，繼被指拍《愛．回家之開心速遞》時鬧走娛樂新聞台女主播周佩婷後，再有幕後人爆料指她聲大大專恰劇中小角色，更與張景淳不時到化妝間VIP房密會。張景淳昨日先在網上發長文護愛，解釋兩人只是在房內拍攝洗手示範片段。
兩人現身將軍澳電視城開工時亦有回應事件，對於被指闢室密會，呂慧儀解釋當日是趁食飯時間找張景淳為她拍攝洗手片段，張景淳亦說：「我哋平時會互相幫手拍片，可能有啲人見到我幫佢拍，會覺得做咩呢？第時會避嫌小心啲。」提到被網民質疑「私藏」呂慧儀片段，他指因電話較新才用來拍攝，片段未出街亦未刪除。
「學吓大大聲地溫柔」
問到被指聲大大鬧人，呂慧儀自嘲說話大聲到有回音，以後會好好調節：「咁我又係大大聲聲講嘢嘅，但同我合作開嘅同事都習慣咗，可能其他人唔知道就會覺得做乜咁大聲。我會學吓點樣大大聲地溫柔，兩者搵個平衡，佢都聽到有少少職業性失聰。」張景淳則說：「佢唔知自己講嘢大聲！其實個廠有好多業餘嘅臨時演員，好似『陳師奶』其實真係一個師奶，有啲對白NG好多次，所以阿蟹同豹哥（單立文）會教吓佢哋，唔知情嘅旁觀者就可能有錯覺，少少誤會唔緊要，講番畀大家聽唔單止係維護阿蟹，仲要維護番錄影廠嘅運作。」講到獲網民讚挺身護花，他指純粹澄清，不想再惹誤會，呂慧儀即說：「我都多謝你嘅！」