林穎彤騰騰震撳住嚟唱
身兼演員及歌手的藝人林穎彤，等了多年才能圓歌手夢，最初因為不適應身份的轉變，令她產生一絲尷尬的感覺，甚至仍未能克服上台唱歌時手震震的緊張情緒。
林穎彤（Bella）應東網巨星節目「海馬牌床褥特約」《閨蜜睡房》邀請擔任嘉賓，一連三集與主持人李文珊（Sherman）分享她的歌手夢。自小鍾意唱歌的她，入行後一直苦無機會，一度令其歌手夢幻滅，直至去年初嘗歌手滋味，她更視之為一大挑戰：「再有呢個機會嘅時候，興奮到不得了，估唔到夢想成真，對我嚟講係好嘅挑戰。」
Bella還記得處女歌推出時，以歌手身份亮相不同節目，心情緊張又尷尬，可能當時還未適應，不過至今仍未克服到手震問題，她笑說：「就算唱咗咁多次都仲係咁，有次綵排都未有觀眾，只係試條聲，但唔知點解隻手都係咁震，唱唱吓我要用另一隻手撳實。」
與狄以達去到化境
最近她與同門的伍富橋傳出緋聞，但原來她與狄以達感情更深厚，因為入行主持第一個節目《安樂窩》，就是跟達仔合作：「我哋差唔多每個禮拜都見，由十年前啱啱識到依家變咗好朋友，中間會鬧吓交，但好快又冇嘢，大家嘅經歷已係去到一個化境。」對於揀男朋友，Bella有何擇偶條件呢？記得本星期五、六、日收睇《閨蜜睡房》，由她親口話畀大家知！