謝芷倫羅浮宮街頭賣藝
最近憑劇集《法證先鋒IV》人氣急升的無綫小花謝芷倫，早在疫情爆發前搭上「尾班車」，趁到英國倫敦工作時在當地遊覽，之後轉戰法國，乘機歐遊。擅長畫畫的她此行走遍各大藝術館取經，更即席獻技在街頭跳舞賣藝，展開一個意想不到的藝術之旅。
謝芷倫（Jan）年前演處境劇《愛‧回家之開心速遞》成功入屋，隨即升呢客戶寵兒，登台、商演機會不斷，不但北上吸金，早前更有幸衝出海外，獲邀到英國倫敦擔任活動嘉賓，她亦把握機會旅遊，寓工作於娛樂。
Jan向來對藝術有濃厚興趣，精通畫畫、芭蕾舞及鋼琴的她，今次遊遍英法兩地的藝術館，獲益良多又過足癮，她說：「每次去旅行都會去博物館同藝術館，今次去咗倫敦國家藝術館、國家人像美術館、V&A博物館、大英博物館、泰特現代藝術館等，而巴黎就去咗羅浮宮，睇咗大半日都唔捨得走，觀賞到不同時代嘅畫作、文物同雕塑，非常讚嘆。」
難得到訪名勝，當然少不免「打卡」，其中Jan在街頭大擺跳舞甫士自拍，竟意外引起外國芭蕾舞者注意，二人交流心得之餘更作勢「跳舞」，吸引大批途人圍觀，猶如在街頭賣藝，令她十分難忘：「我擺擺吓跳舞pose，聽到有人話beautiful，我就邀請佢一齊擺跳舞pose，好多人圍住影我哋跳舞，好似街頭藝人賣藝咁！之後同個女仔傾偈，先知原來佢係ballet dancer，我哋都識跳芭蕾舞，真係好有緣分，我哋仲交換咗ig。」不過，她自爆因樂極忘形瘋狂拍照，結果記憶體不勝負荷，手機最後更失靈，珍貴照片不但全數失去，更賠掉手機，認真得不償失。
撲飛睇魅影 大讚冇得頂
身為歌劇迷的Jan，不但幸運地撲到哈利波特劇場門票，更能現場欣賞最愛的歌劇《歌聲魅影》（The Phantom of the Opera），高呼值回票價：「場景布置華麗，盞吊燈嘅機關又做得好好，成套都充滿驚喜，好浪漫好感動！如果我喺倫敦耐啲，真係想睇晒所有音樂劇。」
Jan非常滿意今次旅程，回味說：「呢個藝術之旅完全係我嘅至愛，睇歌劇、博物館、藝術館，非常滿足！」
海德餵天鵝 劍橋遊船河
除了睇展覽，Jan亦在倫敦市內「遊山玩水」，踩單車、遊船河樣樣齊，行程豐富。她說：「喺倫敦地鐵站附近有公共單車租，當然要試吓啦！我一大早就由酒店出發，踩到去海德公園，佢係英國最大嘅皇家公園，喺公園閒逛、餵吓天鵝，當時氣溫大概5度，見到有人戴住冷帽喺湖中心游水，仲話畀我知唔凍，真係好佩服。」之後她還到康河坐遊船，欣賞兩邊雄偉建築物包括劍橋大學：「游走喺數百年歷史嘅名門學院中，仲見到哈利波特拍攝嘅場景，令我嘆為觀止！」