蔡思貝短訊賀生日 胡鴻鈞冧爆唔急約會
蔡思貝近日忙拍劇及宣傳，昨日是其緋聞男友胡鴻鈞生日，她也只能隔空送上祝福，但胡鴻鈞依然冧爆說：「我有叫佢小心啲，呢段時間同佢保持番少少Social Distance好啲。」但其「前密友」許廷鏗則繼續「絕緣」。
蔡思貝昨日身穿特警制服，偕湯洛雯及蔡國威等宣傳新劇《機場特警》，她透露為角色增肥10磅，現已回復100磅Fit爆身材。思貝早前被指與胡鴻鈞撻着，竟令對方的「密友」許廷鏗反面，除絕迹胡鴻鈞社交網，就算昨日是胡鴻鈞生日亦冇表示；而壽星仔則上載派抗疫物資給長者的照片。
叮囑拍劇小心
思貝昨日受訪，問會否跟胡鴻鈞慶祝，她說：「我已經傳咗短訊畀佢，祝佢生日快樂，最緊要身體健康，至於食飯就隨緣啦！我今晚都要拍《踩過界II》。（有冇同你講許廷鏗啲嘢？）不嬲冇講呢啲。」而壽星仔昨日被問會否嬲思貝不與他食生日飯？他冧爆說：「思貝有Send Message畀我呀！都知佢拍緊劇，我有叫佢小心啲，至於會唔會同佢見面食飯就隨緣啦！呢段時間同佢保持番少少Social Distance好似好啲。」又表示為人為己，生日會跟家人在家食飯，笑言就快冇晒朋友。
湯洛雯呻大隻
至於靚湯以一身空姐Look現身，笑言與張振朗做一對顯得自己更「巨型」，她自嘲：「嘩！我六年班已經過110磅，個頭都30磅啦！我唔爭氣，一直追唔到佢嘅進度，最難搞係件空姐制服，短袖冇得遮，成套劇都圓碌碌！」又透露體重曾高達140磅，現已減至120磅：「我人生最肥嗰陣，有兩個蔡思貝咁重！」
同場的蔡國威被本報踢爆與韓君婷同居，他笑指收到很多朋友祝福，二人是好好的朋友，感覺像家人。