同步出MV對撼 Gin Lee惡鬥AGA爭做一姐
靚聲王Gin Lee跟唱作女歌手AGA為爭「環球一姐」，多年來經常暗地裏角力，為免順得哥情失嫂意，唱片公司寧願冒自己人打自己人之險，決定昨日同步推出兩人的新歌MV。
Gin Lee（李幸倪）早年加盟環球唱片時曾傳與吳雨霏（Kary）爭一姐鬧不和，隨着Kary結婚、三年抱兩，暫未復出樂壇之際，Gin又被爆與同門旗鼓相當的AGA為「一姐」而惡鬥。據聞，AGA的新歌《Mad》原先為配合4月紅館處女個唱，早於2月底已推出，但MV因新冠肺炎影響推遲拍攝。而Gin向來積極進取，在疫情下更是急不及待推出新歌，但唱片公司極少會安排自己人互撼，聽聞兩女暗地裏角力，唱片公司為免傷和氣，最終決定兩女同步推出新歌MV。
就Gin跟AGA為爭「一姐」而傳不和，環球唱片發言人否認：「冇爭！AGA首歌一早出咗，只係因疫情一直未拍MV，而Gin嗰首歌都係推遲咗拍MV，咁啱都拍好咗咪一齊推出。」據知，Gin跟AGA僅是同事關係，私底下沒有任何交雜，AGA比Gin早加盟環球，早就舉行了個人演唱會，不過Gin比AGA早踏入紅館開騷，兩女都是唱得之人，多年來都視對方為勁敵，鬥得難分難解。
對男演員「爆樽」
Gin的新歌《敢》充滿正能量，MV中首次嘗試劍道，她說：「好玩！呢個運動好值得我去挑戰，我本身對劍道毫無認識，原來劍道要用好大力氣，一啲都唔易。」她以身體力行方式，鼓勵大家勇於嘗試。而AGA的《Mad》MV帶出轟烈愛情故事，其中幾個鏡頭AGA與男主角頭貼頭互相噴煙，更有打鬥流血和「爆樽」的激烈場面，她自言感到很大壓力：「我仲要對其中一個男演員爆樽，好感激兩位嘅犧牲。」她表示今次MV是她遇過最轟烈的事，並笑說：「大家睇完MV後，應該會對我平時十分冷靜嘅一面改觀！」
