衛詩雅新片煞停上映 陳庭欣：希望捱過呢關！

昨日政府終於公布所有娛樂場所包括戲院和健身中心等都要關閉14日，不少影圈人士獲悉此事，普遍表示贊成，其中原定下月2日安排上映的電影《熟女愛漫遊》即告煞停，有份演出的衛詩雅對於受疫情影響，新片未能如期推出，她受訪時說：「我覺得係好事，安全緊要過上映時間，我個人嚟講贊成、支持呢個做法，同埋本身我嘅宣傳早排都做定晒，依家惟有喺網上甫嘢宣傳吓，始終疫情咁嚴重，留喺屋企係最安全。」

另外，黃百鳴亦一早計劃下月一日在旗下戲院，上映兩部由「哥哥」張國榮主演的電影《白髮魔女傳》和《夜半歌聲》，他說：「哥哥電影會等戲院開番，再安排上映。」而影帝任達華亦表示贊同：「係好事，我覺得安全最緊要，大家幫手忍一忍，疫情好快會過去。」

此外，藝人陳庭欣之前為男友開設的健身室做生招牌，她說：「正在為停業安排一切，亦要通知員工，依家要停業兩周都冇辦法，不過為咗安全都係好事，希望大家捱過呢關！其實我哋之前防疫措施都做得好足，清潔員工一個鐘頭消毒儀器幾次，每兩星期都會請專業團隊大消毒。」

陳潔玲月蝕六位數租金

至於在觀塘區有兩間Party Room的藝人陳潔玲亦是苦主之一，她受訪時表示其實早於2月已暫停營業，但因為此行業沒有酒牌及食牌，因此未能申請政府抗疫基金，她表示最近員工已放無薪假期，最難捱是每個月硬蝕六位數字租金：「以我所知好多同行都已經執咗笠，嚟緊成個行業會有好大嘅倒閉潮，依家我積極同業主傾緊可唔可以疫情期間免租，最好就係政府可以補貼到租金，又或者可唔可以立例叫業主免租，直至疫情結束。」