預咗見番歐鎧淳胡子彤諗定對白
藝人胡子彤昨日到電台宣傳創作處男作《那時候》，他透露有學唱歌，希望往歌手路進發：「老闆知我鍾意，就問我有冇興趣唱插曲，我幾秒就決定唱，但嗰陣未諗要填詞，係音樂班底叫我寫吓嘢，了解吓我嘅想法，寫寫吓就有第一份詞。」
談及日前在Instagram留言「你的左手準備好給我牽嗎？」，被懷疑有新戀情，他澄清：「純粹寫啲嘢，覺得ig啲嘢好負面，想寫啲開心、正面嘢。」並揚言已走出情傷，Ready接受另一段情：「仲搵緊，要遇啱先得，但依家唔敢出街，所以唔心急。（有冇搵前度歐鎧淳？）暫時未。（見番面第一句講咩？）都係『你好嗎』，大家都係行內人，遲早會撞到。」