阿Sa晒巨鑽滿場飛

阿Sa早前於「2019澳門國際電影節」及「澳門國際電視節」頒獎禮中，分別憑電影《非分熟女》及網劇《PTU機動部隊》奪得「最佳女主角」，成為雙料影視后的她，前晚獲經理人公司老闆楊受成牽頭，為她於銅鑼灣舉行慶功宴，一眾英皇兄弟姊妹容祖兒、任達華、陳家樂、衛詩雅及湯怡等齊齊分享喜悅。

Twins合體馬國拍劇

戴巨型鑽戒的阿Sa，帶同兩個獎座興奮滿場飛。得獎至今已一個月，但完全沒有慶祝活動，她解釋：「今晚咪慶祝囉！大家都好高興，心意知道就得，好耐未試過咁齊人。」農曆新年將至，她笑說：「每年都會去老闆（楊受成）屋企拜年兼開局，我以往斬獲都幾多o架！」

阿Sa拿着兩個獎座滿場飛，不經意大晒手上巨鑽。	刮痧「出火」後的容祖兒，大晒手上「戰績」。	一眾英皇兄弟姊妹聚首，場面熱鬧。

至於工作計劃，阿Sa透露Twins將合體到馬來西亞拍攝網劇：「同阿嬌（鍾欣潼），仲有關智斌、何珮瑜（Jeana）合作，都幾期待，況且呢個劇本係近年我睇過入面最好睇嘅一個，預算我要留喺馬來西亞幾個月，方便進行拍攝。」

而容祖兒上周六於澳門順利完成音樂會，她透露開騷當日上午喉嚨突然劇痛：「好彩我哋真係『藥箱都變成首飾箱』啫，有好多藥喺度，即刻啪咗粒。呢兩日去咗針灸放血同刮痧，依家兩隻手都刮出啲火嚟，所以應該會好啲o架喇！」談到早前的膝頭勞損傷患，她透露仍處於康復狀態：「跳完舞要即刻敷冰，之後要浸番啲熱水，令血液循環，同埋盡量喺演出以外遠離高踭鞋，唔好太大嘅工作量。」

大年初一正式展開世界巡迴演唱會的祖兒，首站是美國拉斯維加斯，不過今次容母不會同行，祖兒說：「佢想留喺香港，多啲時間同BB（祖兒弟弟的女兒）收利是、拜吓年咁。Mani（霍汶希）會照顧佢、接濟佢呀！因為霍家逢初一、初二都大排筵席，髮菜蠔豉、鵝掌、花膠、海參任食，媽咪一定有口福。」