歌手鄧紫棋（G.E.M.）一出道順風順水，同前經理人張丹拍住上，一早睇準內地巿場跑咗上去掘金，結果名成利就，大家都恭喜佢。既然內地得意，香港市場當然淪落做咗二奶，結果厚此薄彼下，團隊返親香港都同傳媒不歡而散。不過地球係圓嘅，早前G.E.M.同合作12年嘅唱片公司蜂鳥音樂爆出合約糾紛，事件已進入法律程序，G.E.M.宣布組成「鄧紫棋工作室」繼續發展事業，仲出埋新歌《句號》暗示同舊公司玩完。
正所謂今日留一線他朝好相見，G.E.M.少咗唱片公司做靠山，真係要出雙倍努力先保持得住喺內地儲番嚟嘅人氣；假如想返香港氹番「二奶」，至少要同傳媒搞番好啲關係先。
所以話呢，做人唔使太圓滑，不過本分要做到足。今日唔知聽日事，有朝一日搞到「兩邊不是人」，就咪話唔頭痛。