35歲內地男星文章做過百花影帝，不過花邊新聞比佢嘅演技更受注目，最近竟然打算翻撻幾乎搞禍佢同影后老婆馬伊琍婚姻嘅「最強小三」姚笛。本身已經冇乜形象嘅文章真係膽識過人，懶理網民狂踩，搞唔清究竟係腦充血定係愛到出血，之但係姚笛就頂唔住人言可畏，出動另一舊愛轉移視線，又畀人鬧做戲。
有三條路建議畀文章行嘅，第一，如果真係咁愛姚笛，就出嚟坦白認愛，做番男人嘅擔當，雖則必定有排唔會獲得祝福，預埋事業沒有最低只有更低；第二，果斷斬纜，單身幾年衝刺番事業先，重建形象，適當時候再搵住「好人家」；至於第三條路……文章曾經喺《西遊．降魔篇》演唐三藏，可惜現實中就犯晒色戒，與其如此，正所謂色即是空，索性出家為僧六根清淨啦！