施匡翹試鏡當騙案：咪呃我啦

施匡翹（Zaina）推出第一首歌曲《初心》，勉勵大家遇到挫折時不要放棄，而另一重意思是講述關於初戀的感覺。現年23歲，外表斯文清純靚女的她，雖然熱愛唱歌，但原來當初並未想過入行，入行經過更誤以為是騙案，她笑說：「中學大約18、19歲，有日放學搭車嗰陣，無啦啦有兩個女士行埋嚟，話有個廣告好適合我，問我有冇興趣試鏡，我心諗唔好呃我啦！佢就叫我可以上網睇呢間公司，於是我就同媽咪上網睇，原來呢間公司係可信嘅，所以我就同媽咪上去試鏡，開始咗拍唔同品牌嘅廣告，而歌手身份就係拍咗唱歌嘅片上網之後，有人將我介紹畀依家嘅經理人識，所以就正式做歌手。」

兼顧讀書唱歌

Zaina坦言家人很支持她入行，但要完成幼兒教育的學業，問到邊讀書邊唱歌可會難兼顧？她坦言：「初頭會，但依家愈嚟愈慣。（有時要走堂？）有o架！因為有工作我都會盡量把握，所以無奈地要請假，同學都好體諒。」又笑言同學會對其藝人身份好奇：「但唔係問關於我，係問關於佢哋鍾意嘅藝人，又叫我偷影佢哋。」

難有仔埋身

講到公司下令十年不准拍拖，她笑說：「所以冇乜幻想，惟有睇書，我鍾意睇心理勵志嘅書。」她又謂喜歡成熟、樂觀、善良、孝順的人，年齡沒有所謂：「只要佢個人思想成熟就得，細過我都得。（媽咪聽到十年唔可以拍拖咩感覺？）佢冇咩所謂，因為佢鍾意我陪佢。」講到她外表靚女高挑，性格溫文，理應很多人追？她笑說：「其實係相反，可能因為我中學讀女校，依家讀幼兒教育又係女仔多，好難接觸到男仔，而依家做嘢都係嗰一下，未必會再聯絡，我個人又比較內斂，所以就唔係呢回事。」