張沛樂有「新兵」 落閘唔復合
藝人張沛樂（沙律）與林耀聲早前宣告「甩拖」，回復單身的沙律，揚言雙方仍「有偈傾、有感情」，卻斬釘截鐵說沒復合可能，亦有新追求者出現：「見佢好開心呀，我又好開心吖！」
沙律與林耀聲拍拖3年多，最終分手收場，前晚她出席電影首映禮，講到聖誕節，她自嘲：「今年要唱番首《Lonely Christmas》!（習唔習慣一個人過？）OK呀！第一次自己搬出嚟住。」二人不經不覺已分手兩個月，問會否感可惜？沙律似乎已收拾情傷，透露雙方再見亦是朋友：「可惜又唔會，人大咗明白咗，但我哋都有聯絡嘅，仲係朋友咁傾偈，我都好錫佢，都有感情，我哋係和平分手。」
但問到可有復合機會，她卻堅定說：「唔會啦！（咁絕情？）因為我嘅性格唔會囉！人應該向前行，做得呢個決定，唔係一時衝動，知道自己想要咩，明白條路點行。」她直言現時很開心：「見佢依家幾好，佢好開心呀，我又好開心吖！」
學獨立唔靠人
被視為「宅男女神」的她，是否有追求者出現？她爽快說：「一定有o架啦！（真係好有自信？）但我真係唔諗拍拖住，唔考慮住，始終分手兩個月啫，唔使咁快有新戀情。」不過，她坦言單身亦有辛苦之處，要變成「女漢子」去處理各種事情，當然都想有人在身邊支持，現要學習獨立，不能過分依賴別人。