懷舊南半球:23歲日本混血女星池田依來沙近日為電子雜誌拍攝以90年代超模為主題嘅寫真，換上心口開窿設計、低胸高衩黑裙嘅佢大晒南半球，妖艷性感。粉絲驚訝大叫完全認佢唔到，仲不停留言：「佢真係池田？」又讚90年代造型同佢襯到絕！
25歲日本女星廣瀨Alice近年與妹妹廣瀨鈴同樣活躍藝能界，尋日佢現身為相隔五年推出嘅個人寫真集宣傳。前年被爆同外號「籃球王子」嘅28歲職業籃球員田中大貴拍拖嘅Alice，被問到聖誕節係咪同男友過，佢即時喪笑只話「無可奉告」，睇佢一副懶神秘嘅樣，睇怕已經安排好節目。
前日係美國樂壇巨星Taylor Swift 30歲生日，但慘慘豬要開工度過！佢獲邀出席紐約嘅Z100 Jingle Ball聖誕電台騷，大會都好識做，期間推咗個三層高嘅蛋糕出嚟畀佢，cake面仲貼滿晒佢最愛嘅貓咪大頭照，認真有心思！而生日前夕，Taylor喺Billboard雜誌舉辦嘅女性頒獎禮獲頒發十年女性獎，絕對係生日其中一件厚禮！