陳瀅聖誕撇陳家樂約「申」歡睇戲
為動畫獻出處女配音的陳瀅大呼新奇有趣，自嘲外形跟角色相若，故配起上來零舍有親切感，又自爆趁聖誕節相約男伴一齊睇，莫非要公開「戀情」？
陳瀅最近挑戰做聲優，為穿上紅鞋便會變高、瘦公主的肥公主一角配音，自嘲是不二人選：「開頭收到預告片，仲以為搵我做巫婆，因為唔係行開公主路線，但一知道係肥公主就覺得好適合，連導演都讚我配得特別好。」
誇張尖叫勁頭痕
新片將於聖誕節上映，問到可會約緋聞男友陳家樂或「老公」Howie一齊睇？她自爆約了男伴：「約方力申！因為佢係第一個話想睇，可能想睇我嘅表現，哈哈！」並自爆擇偶條件：「我唔睇外貌，心地好最重要，有時遇到好多大隻靚仔，但佢哋一開口講嘢就穿晒煲！」她透露角色有大量尖叫場面，令不習慣以誇張方式演繹的她非常頭痕：「當初話要配兩日，我仲好招積話三個鐘乜都得，但第一日用咗六個鐘都未完成！花咗好多時間夾嘴形同速度。」
心思思闖樂壇
剛生日踏入「3字頭」的她，目標做個更加出色的演員，考慮完成手頭上工作後進修戲劇，有機會都想向音樂進發：「不過自己比較被動，唔識得去爭取。（自資出歌？）好大勇氣，或者會問吓監製有冇片頭、片尾插曲唱吓先。」
化妝：Vanessa Wong