李麗珍放聖誕假 佳人有約
藝人李麗珍、袁富華與陳國邦等前晚到九龍灣出席ViuTV劇集《娛樂風雲》煞科宴，李麗珍因交通問題遲到，她直言每當遲到便會胃痛及頭暈，故盡量也不遲。她表示煞科後會放假休息，女兒亦回港過聖誕：「不停工作咗七個月，要叉電放假，短期唔會拍劇住，休息吓先。（聖誕有冇男士約會？）唔係好記得喎！都有人約嘅。（係咪唔會揀圈內人？）暫時又未遇到，都冇特別去諗，未有嗰個Feel。（擇偶條件？）風趣幽默，唔好認叻，同埋感覺舒服。」
羅敏莊爆女兒有主見
至於陳國邦帶同老婆羅敏莊及女兒陳禛到場，問會否一家人拍劇？羅敏莊笑說：「應該唔會，因為拍劇時間好長，個女開始大，有啲啲少女心！以前叫佢跳舞表演會即刻跳，依家就算氹佢好耐都未必肯跳，有自己主見。」陳國邦則表示要尊重女兒意願。
袁富華早前憑電影《叔．叔》入圍台灣金馬獎最佳男主角，卻未有出席頒獎禮而引起揣測，他說：「自己疏忽，因為已經安排咗工作，經驗唔夠，金馬獎搵我做頒獎嘉賓嗰陣套戲都未參賽，講聲唔好意思，依家知道要留檔期。（因為政治問題避席？）好多人都會咁諗，但事實上係因為有工作，我暫時又冇內地工作，無謂咁多揣測。」
