陳庭欣搶千嬅老公「全裸」挑機

歌星楊千嬅17年後再為無綫拍劇，她孭飛的台慶劇《多功能老婆》前晚首播，全集焦點落在「小三」陳庭欣的全裸露股戲上，飾演千嬅老公黃浩然「小三」的她與千嬅及其兩位閨蜜陳煒、朱晨麗碰個正着，閨蜜們更去「小三」房玩踢竇，摷出安全套及性感黑色喱士睡衣，但千嬅仍懵盛盛。後來陳庭欣大報復，踩到溫泉與千嬅攤牌，更全裸兼露股向千嬅說：「我今日嚟係諗住同你赤裸相對講清楚，我冇生過BB，生肖細你一個圈有多，點都優勝過你呀！」令觀眾睇到眼火爆！

差啲凍到暈

陳庭欣受訪時說：「個屁股係我嘅，但我嗰陣有着褲，做咗後期我都懷疑自己嗰陣唔通冇着？自己都嚇親，佢哋整到比我本人更白滑。」問到拍性感場口底線，她說：「冇嘞！到晒底線嘞！我嘅底線係露晒啲假嘢畀人睇，全部都唔屬於我自己，但感覺上又好屬於自己咁，呢樣先最正。」她又透露拍這場戲時正值日本冬天，與千嬅於冷熱兩極之間很痛苦：「千嬅浸溫泉浸咗好耐，浸到就嚟暈，我就喺上面凍到就嚟暈，嗰陣又落雨喎！我都淋到濕晒，場戲拍咗好耐，我同千嬅都差啲冧低。」

陳煒被睇全相

而朱晨麗、陳煒前晚出席活動時同聲表示劇中有泳裝上陣，陳煒笑指早已被對方睇勻全相，朱晨麗又說：「佢話未見過女仔搽粉喺肚臍。」陳煒表示計劃為下月生日的朱晨麗慶祝，被問到有否見過對方緋聞男友何廣沛時，陳煒說：「見過好多次。（佢哋有冇甜蜜舉動？）Sweet留番私底下，呢啲嘢心照啦！」