張振朗遇天降攝影機扑傷入院
被戲稱「地獄黑仔王」的無綫藝人張振朗再來一單黑仔事件！繼前年被天降帳篷擊傷後，前日為台慶排舞時突然被吊臂攝影機從天而降擊中，要立即入院治理，認真無辜！
今日11月19日是無綫台慶日子，因應社會環境，今年《萬千星輝賀台慶》改名為《珍惜香港發放娛樂TVB 52年》，節目依然有藝人表演不同項目，包括跳舞、唱歌、玩樂器及行Catwalk等，被力捧上位的張振朗將與著名排舞師麥秋成大跳型格街舞，但前日綵排時發生意外！
醫院撩女 硬食檸檬
當時一部吊臂攝影機突然從天而降，砸向張振朗上身及另外一名無綫藝訓班學生，他當堂大感疼痛，隨即送院檢查。無綫安排專車將他與同告受傷的藝訓班師弟送往聖德肋撒醫院診治及照X光，等候應診期間，他見到鄰座有一名兩、三歲女孩，突然愛心大發，忍痛撩女孩玩耍，但女孩似乎不領情，嚇到大哭並返回一名男子身邊，硬食檸檬的張振朗顯得相當尷尬！其後他接受醫生診治後見無大礙，繼續返電視城綵排。無綫助理總經理（非戲劇製作）余詠珊昨日回應記者查詢，簡述當時情形：「佢傷到左膊，現場嘅人都好驚，忙住查問佢傷勢，雖然睇嚟冇乜事，但叫佢去醫院檢查，醫生證實佢啲骨冇嘢，但叮囑如果覺得有問題就返去再照吓。」對於有指此部分表演為錄影部分，余詠珊否認，表示是現場直播。
昨晚張振朗透過電話回覆本報，表示傷勢沒有大礙：「多謝關心！冇撼到頭，係撞到膊頭嘅位，休息吓就OK，點都要做埋個Show！（傷勢痛唔痛？）痛呀！所以要食止痛藥，好彩照過冇裂骨，但之後會再照清楚，睇吓軟骨同韌帶有冇受傷，因為之前啲舊患都未好番晒。」而他昨日如常練習，戴帽現身的他接受《東張西望》訪問，見他精神不錯，但沒有提及受傷一事，只說：「好開心第一次挑戰跳舞，今次代表訓練班跳，自己係訓練班出身，係開心事。」