Fun外情
操到起格！荷爾芭莉:今年已經53歲嘅荷里活女星荷爾芭莉，早排拍《殺神John Wick》第3集大耍功夫，證明寶刀未老！佢啱啱先喺社交網站Instagram上載自己操到6舊腹肌一格格嘅自拍照，原來係為咗新片《Bruised》演一個綜合格鬥家，佢話好開心終於操到，有志者事竟成！
「媽媽生」抽水:菊池桃子
51歲嘅80年代日本偶像菊池桃子日前宣布再婚，下嫁60歲經濟產業省局長新原浩朗，但新一期雜誌《Friday》踢爆新原原來勁躁底，成日扯起下屬衫領逼埋牆大鬧，擔心菊池會成為受害者。不過菊池尋日就喺電台節目維護老公，讚佢溫柔體貼。
而有「AV版菊池桃子」之稱嘅AV女優菊市桃子就趁機抽水，宣布下星期為銀座一間夜店做限定一晚嘅「媽媽生」，接客搵銀！
勝利之B:川榮李奈
5年前喺握手會被斬傷手嘅女團AKB48前成員川榮李奈，今年5月同舞台劇拍檔廣瀨智紀奉子成婚，點知畀人篤爆係「小三」，踢走咗男友拍拖多年嘅同居女友！前日，佢喺社交網宣布順利生B，但冇話男定女，只話：「同BB健康度過嘅每一日，都覺得好幸福。」雖然個底花花哋，但生B話晒都係開心事，同佢合作過嘅綾野剛、竹內涼真同山田裕貴都有留言祝福。