倪晨曦橫跨三地辦婚事
女神倪晨曦（Elva）早前在巴黎與從事金融的男友Vincent訂婚，定於明年1月在夏威夷行禮，2月26日在港擺酒，由訂婚到擺酒，橫跨三地完成人生大事！
Elva選定簡潔款式的婚紗，拒絕性感：「唔係呢個風格，着得舒服、行得舒服，希望喺最舒服嘅狀態進行婚禮。」她透露會在夏威夷舉行小型婚禮，只邀請約50名親友，計劃明年2月在港擺酒。重提獲驚喜求婚，感動到喊，她指未婚夫其實並不喜歡驚喜：「有年佢生日，搵咗間餐廳訂咗蛋糕同佢食餐飯，試新嘢，點知佢話嚟過，蛋糕又唔係佢最鍾意嘅味道。佢有自己鍾意嘅嘢，預先討論過可能會仲開心。」
未婚夫缺點變優點
她讚未婚夫最大優點是孝順，認為他重視家庭，將來必定亦會好好照顧自己的家庭，至於缺點，其實也是優點，Elva說：「佢做決定時好慢，比較完美主義者，自我要求高，想樣樣都做到最好。」問到Vincent喜歡她甚麼？她笑說：「好多啩？數唔晒，我諗可能覺得我好善良，同埋我係好開心嘅人，比較善忘，有唔開心都好快過，同我一齊時所有時間都開心。」Elva希望婚後工作與家庭並重，但坦言會放較多時間在家庭。
婚紗：AOLISHA DORIAN HO
髮型化妝：Eas Fu@Admix、Janice Lam@Glowmakeupacademy