收警察來電 坤坤心虛：驚做錯事！

吳業坤（坤坤）與吳若希（Jinny）昨晨出席慈善行活動，坤坤重提視為「老婆」的愛車險「毁容」一事，大叫好彩：「當日泊喺天橋底，唔知塊鐵板喺邊度飛落嚟，跌正我同前面部車嘅中間幾厘米位置，神奇嘅係兩架車都冇事，唔使整，但都有賠償。（有報警？）前面架車有，所以當警察打畀我嗰陣都有啲怯，驚自己唔知做咗咩錯事，不過平生不作虧心事！今次算係不幸中之大幸，希望呢份好運延續落去。」

未簽新唱片公司

問到得幸運之神眷顧，會否助他順利簽新唱片公司？他笑言暫時還未有着落，稍後會飛馬來西亞拍邵氏新戲《非凡三俠》：「半工作半假期，會帶埋媽咪去。今次去一個星期，都唔係拍得好密，寓工作於娛樂。」又透露主要跟一位女演員有對手戲，但劇本未見親熱場口：「到現場睇吓點樣調節。（操Fit做準備？）咁又唔使。（你Body仲係Fit？）唔好再提，過咗去嘅嘢唔好留戀！」

「老婆」差少少被鐵板擊中，坤坤大嗌好彩。

吳若希撇低囡囡，偕老公拍拖出席活動。

至於Jinny則與老公何兆鴻（Alex）拍拖現身，朝朝早起的她，自誇湊女返學冇難度。問到為何不帶囡囡前來，她說：「佢未瞓醒，難得放假畀佢瞓，加上老爺、奶奶嚟咗，畀佢陪吓老人家。」又笑言發現小朋友讚不得，因為會讚壞：「上次話佢好鍾意返學之後，佢第二日起身就話唔想返學，所以唔讚得！」

吳若希取消出埠

談及之後的工作安排，Jinny自爆原定下月出埠拍旅遊節目，但臨時取消：「好似話會飛埃及定摩洛哥，但當地好似唔係咁方便，變咗可以留喺屋企湊女。上次走咗10日拍《森美旅行團3》，去到第5、6日好掛住個女，喺酒店房睇住佢啲相喊。（第一次離開咁耐？）又唔係，但依家同佢多咗互動，有時臨出門口問我去邊，都好窩心！」