大台有個「觀音兵」，入行多年事業成績可以話零，最為人記起嘅就係佢啲追女新聞。當年佢同成班同輩分別傾過檔，人哋個個都係高層聯絡相邀，只有佢係靠黐先掹車邊簽入大台，但咁多年嚟都係投閒置散，浪費青春！
近日佢終於等到個機會！話說有個藝人搵到贊助，可以出埠拍一個另類旅遊節目，原本呢個藝人想益吓自己嘅朋友，一齊搭檔演出，點知節目監製畀「觀音兵」冧掂，完全冇顧過「主導者」嘅意願，夾硬要「觀音兵」加入。好喇到畀咗機會佢，但「觀音兵」出到埠就完全冇分莊閒，不時出言不遜，句句窒住晒，又寸爆身邊人，加上經常搶對白講，搞到個個好冇癮，不過鬼叫「觀音兵」有人照咩！嗰個無辜被抽水嘅藝人，滿肚冤屈氣，最多只敢搵人呻兩句咋！
