李彩華提前「B」計劃希臘造人
藝人李彩華前晚完成舞台劇首場演出，原本分身不暇的丈夫Eric突然現身送驚喜，令她感動不已。完騷後，她與家人為母親慶生，得知其生日願望是抱孫，決定提前生B計劃。
由李彩華（Rain）與李國祥主演的舞台劇《恆河經變》，前晚首場公演。去年下嫁內地商人Eric的她，指丈夫事前表明有工作在身，難以抽空撐場，豈料突然趕到驚喜現身，還帶同Rain的媽媽前來欣賞演出，令她既開心又感動！適逢昨日是母親生日，完成演出後Rain拉大隊為她舉行生日會，問到生日願望，她竟在眾人面前表示恨抱孫，事出突然令Rain不及反應，只能以笑打圓場。
舞台劇首演贏盡掌聲
Rain讚老公相當細心，完成演出後便會雙雙到希臘旅行，為圓母親抱孫的心願，不排除在當地積極造人：「去希臘Santonrini係我自小嘅夢想，原來老公事前秘密安排咗喺我完成個騷後，就一齊出發旅行，我知道嗰刻真係好感動！（積極造人？）其實生B計劃一直預計下年開始，但既然今次有機會去希臘，就索性喺當地開始進行計劃。我諗喺一個咁浪漫地方行事，可能命中率會高啲。」
對於首場演出贏得全場掌聲，Rain表示相當感動：「成個團隊用咗好多心機去綵排，首場演出好成功，大家都打咗支強心針，繼續愈做愈好。」為了其中一個印度窮家女的角色，她親自設計一個印度Hanna（彩繪）圖案繪在手上，加強演出效果。