工藤佑采心急搣脂操波唔黑面

現年26歲的工藤佑采，去年參選港姐12強止步後，重操OL故業。近日「復出」亮相ViuTV節目的她，身材比選美時略為圓潤，據知她最近頻頻運動操Fit，早前見她現身北角運動場，與同行一男一女打羽毛球，原來男的是國家羽毛球初級教練，女的則是中銀紫荊盃最佳女運動員，有兩位猛人陪練波，認真巴閉！

心郁拍戲做網紅

工藤先與女教練合作拉筋熱身，落場後，見她球技認真麻麻，手腳生硬，多次追不上球。男教練對她握拍的動作甚為嚴謹，指點一輪後，工藤接球明顯有進步。她又被安排與女教練一前一後接波，練習約半小時後，見其球技突飛猛進，成功殺波後更罕有露出笑容！

事後聯絡工藤，問到請兩位教練陪打，是否急於操Fit復出？她承認現時身形未夠Firm，希望回復選美時的狀態：「嗰位伍Sir係我朋友，之前唔知佢教打波，最近想試吓運動就搵佢，佢免費教我，仲帶埋女助教。我主要想改善手腳唔協調，最初發覺自己唔協調，係唔可以邊唱歌邊跳舞，淨係唱歌就得，夾埋一齊就難。（準備復出？）我都想試吓拍戲做主持，依家有拍片放喺微博，亦有傾過做內地網紅。」

打到論論盡盡，「黑面神」工藤都忍唔住笑。	放大圖片	教練捉住手，教工藤正確的握拍手勢。

談及因「黑面」成名，她完全不介意，更自嘲：「黑面幾好，我唔講嘢就黑面，咁多年冇乜所謂，外國都好多唔同類型藝人，唔一定個個好甜美，可能Fans鍾意我黑面。」至於會否再戰選美舞台，她笑言可能性不大，自嘲年紀大，但有朋友鼓勵她參加中國小姐選舉。