單文柔拒做怪獸開會傾教女

前港姐單文柔（Phoebe）今年4月為老公陳展鵬誕下女兒「小豬比」，現時忙於湊女的她最近已成功收身，但仍嫌未夠弗要繼續努力。五個月大的「小豬比」變成家中開心果，除了是父母的快樂泉源，亦是減壓良方，她笑說：「BB算好乖，好唔舒服先會喊，仲成日笑到卡卡聲，喺屋企好似有個開心果咁，變成我哋嘅減壓工具。」

抽空二人世界

Phoebe笑言多得女兒溶化展鵬，令老公變得溫柔體貼：「佢對個女好溫柔，對我都有間接影響！有幾次大家好認真傾嘢，BB望住佢卡卡卡咁笑，見佢個樣係完全溶化咗。BB見Daddy個樣又特別唔同，特別冧滋滋，有時佢放工好攰，但見到個女就開心晒。」

「小豬比」成為兩夫婦的開心果！

單文柔想陪「小豬比」成長，遲啲先追多個。

雖然大部分時間照顧女兒，仍不忘抽空二人世界，Phoebe說：「個女變得好快，隔幾日就好似唔同樣，起碼兩、三歲前都希望多啲時間陪佢成長。不過我哋都傾過，因為結咗婚好快就有小朋友，所以都要保留啲二人世界嘅時間，有時屋企人幫到我哋睇住，就偷時間出去食餐飯，或者去個短旅行。」

講到追多個，Phoebe表示再過一、兩年才考慮，現時會集中精神照顧「小豬比」，夫妻間亦不時為女兒的成長「開會」，她笑說：「我哋嘅共識係睇個女嘅性格，如果個女好動，就未必會用傳統教育，可能會畀佢喺運動方面多啲發展，最緊要有個快樂童年。」

服裝：@I.carene

場地：Kidspace童境