梁舜燕設靈 胡楓願好友安息
資深藝人梁舜燕上月離世，享年90歲，昨於世界殯儀館設靈，在娛圈工作超過60年的她人緣甚廣，不少藝人到場致祭，計有契仔李克勤與太太盧淑儀、劉少君、汪明荃、宣萱、胡定欣、姚子羚、胡楓、羅蘭、李司棋以及久未露面的溫柳媚、葉尚華等，譚凱琪與張彥博離場時眼濕濕，而克勤夫婦逗留約個半小時離開，雙手合十，未有接受訪問。
梁舜燕孫仔阮浩棕與阮浩鋒代表家屬受訪，浩棕指嫲嫲一生精彩！並指特別向無綫借用劇集《黃金有罪》的照片作為嫲嫲的遺照，遺照旁亦放滿她喜歡的百合花。完成所有儀式後，嫲嫲會與爺爺合葬。
胡楓受訪時一度眼濕濕，直言對梁舜燕有一份歉疚：「若干年前，我同佢拍戲嘅時候，哼咗一首歌《One Day When We Were Young》，之後我哋一齊唱，非常之夾，佢有個心願話想同我喺電視上一齊唱，但一直未唱到，未能完成佢嘅心願，不過，好彩去年佢生日嘅時候唱咗，希望佢在天之靈得到安息。」
