葉翠翠數臭外傭惡行報警求助

現懷有第三胎的前港姐冠軍葉翠翠，早前僱用兩名菲律賓籍家傭，豈料對方不願工作「博炒」之餘，更加惡行連連，曾經搣翠翠細仔「小小王子」及偷用家中資源擅自煲雞湯等，其後還向其粉絲發訊息抹黑，翠翠終忍無可忍，昨日爆Seed在社交網反擊：「當日請咗兩個菲律賓工人，來到發現原來從未試過工作，而且發現係兩姊妹。先後大大聲話唔再工作，叫我炒佢、補錢，仲話去菲律賓領事館投訴我。」又指二人態度欠佳：「BB水壺、水杯從來唔洗，抹碗布同地布夾埋一齊，種種惡行不能盡錄，看盡人性醜惡……」又指已去信入境處及曾報警求助。

隱瞞親姊妹關係

翠翠接受訪問時猶有餘悸，坦言兩傭人分別只工作了24日及1個月零9日，最離譜的是她們隱瞞是親生姊妹，連中介公司亦不知情，她說：「我請佢哋之前，佢哋聲稱有工作經驗，原來嚟到後乜都唔識，先話係自己人生第一份工！之前發覺啲水杯同囝囝嘅水樽有陣噏臭味，點知畀我見到佢將條碗布同地布都放入佢哋個工人廁所！」

擅自煲雞湯享用

除了清潔有問題外，翠翠還發現有人將士多啤梨用生水濕一濕便給兒子吃，又指有次入廁所時聽到細仔大喊，出來時見到其中一人搣着他的手臂，講到飲雞湯更勞氣說：「唔係煲畀我一家飲，而係佢兩姊妹分享！」坦言家中有安裝鏡頭，故有很多證據在手。她又指兩人已離開，並另聘三名外傭，但多月後才履新，現時惟有靠自己。