吳浩康投資錄音室等回報
吳浩康（Deep）前晚出席Live演唱活動，順道宣傳新歌《船頭尺》，歌曲構思來自經典電影《秋天的童話》，更特別請來該片導演張婉婷及師姐何嘉莉「出山」為他仗義客串拍MV。問到將來嘉莉要幫手也義不容辭？他說：「當然啦，只要用得着小弟，絕對冇問題，教佢小朋友唱歌、彈結他都得。」
Deep表示計劃開設「唱歌加彈結他」課程，正搞一間小型錄音室，近日買音響已花了30萬，投資後希望有回報：「不過係吃力同有壓力。（羨慕關智斌開紅館演唱會？）係呀，佢都好唔容易嘅，由出道唱歌到拍劇，再返嚟唱歌，佢冇放棄過，堅持到依家終可以捉緊機會，自己都會好好學習。」