陳家樂畀鬼壓「有把聲耳邊咆哮」

陳家樂認為不夠休息才會遇上靈異事件。

藝人陳家樂、麥家瑜及岑日珈前晚出席活動，家樂自言喜歡聽鬼古：「唔會驚，可以嚇吓身邊啲人。」他又分享有次到馬來西亞宣傳鬼片，親身經歷的靈異故事：「嗰日好攰，因為拍完通宵，去到酒店話30分鐘後出發去宣傳，所以諗住喺房瞓一陣先，點知我間房開唔到門，所以去咗同事間房瞓一陣。」他續說：「點知瞓瞓吓，突然感覺到有股力喺床尾壓落嚟，然後一步一步向上，之後聽到有把小朋友聲喺我耳邊咆哮『起身呀』，我即刻嚇到彈起，好驚！」

狀態差Say Sorry

他透露當時不能說話和郁動，只能心裏默唸不好意思，隔了一會兒才沒事。他笑言本身不想告訴同事，免得嚇親對方：「但去到夜晚忍唔住同佢講間房有嘢，嚇到佢成晚冇瞓覺，下次都係忍口唔講。」問到之後出埠，可有戴平安符？他表示：「冇乜特別，我冇做啲傷害佢哋嘅嘢，唔會有乜報應或怪我，應該嗰下狀態差同佢哋Connect到。」

麥家瑜惡鬧兇靈

同場的麥家瑜透露早前到泰國拍鬼片，在酒店房亦發生怪事，有一晚打算早些休息，但凌晨時分，衣櫃的趟門不停打開不能關上：「櫃入面有燈，着咗燈瞓唔到，如是者我係咁上上落落張床，閂咗道門幾次，到第6、7次就開始覺得唔對路，嗰陣唔識驚，反而係嬲，因為我要好早起身，所以就發脾氣好大力閂門話『唔好玩啦』，之後就冇事，但依家講番都有啲手震震。」之後在酒店住了一個月都沒事，她笑言可能因為自己惡過對方。

岑日珈以露背裝性感示人。

酒店的衣櫃門被狂開，令麥家瑜徹夜難眠。