任晴佳冷艷搶Fo母女檔搵銀
名模琦琦與愛女任晴佳（Ella）母女檔上陣，為護膚品牌拍攝硬照。Ella盡得媽咪真傳，無論清純甜美抑或冷艷高貴的造型，都應付自如，星途無可限量。
琦琦與任達華的14歲愛女任晴佳，高挑身材加天使面孔，成為模界新寵。Ella最近為品牌拍下靚相，演繹多款不同造型，更以母女裝上陣，台型絕不遜於身經百戰的媽咪。琦琦昨日現身活動，強調愛女現時以學業為重，參與拍攝只是想她有多方面的經驗。
提到老公早前在活動上遇刺，琦琦直言很難過：「我係最後一個知，華哥話唔准講我知，但之後老闆楊生話做手術一定要家人同意。」她指從微博上得知老公出事，當時未聯絡到他：「當時心跳加速，是人生中最難過的時刻，因為唔能夠喺佢身邊。我上機前華哥打咗麻醉針，所以傾唔到偈，後來航班延誤，加上返到香港太大雨，唔可以即刻落機，係最痛苦、最漫長嘅五個小時！」
她透露現時在家休養的任達華，享受着五星級待遇，琦琦笑言：「我自己學煲湯煮飯，難得佢認同我廚藝，大家爭煮畀佢，佢想食咩就煮咩。（你工作有冇影響？）老公最重要，難得佢有假期，我將出埠工作押後。」愛女得知爸爸受傷後，曾大喊：「好無助，但上機後個女攬住我，我哋一齊祈禱，佢真係貼心小棉襖！」
林愷鈴怕行性感
而同場藝人龔慈恩的女兒林愷鈴（Ashley）以黑皮褸到場，表示平日打扮會問媽咪意見，至於會否性感示人，她即指媽咪比她更開放：「佢覺得我應該要嘗試多啲新嘢，反而我自己冇太大信心。」