陳奕迅貪型打網球「放電」治臭脾氣
歌神陳奕迅（Eason）熱愛打網球，自認細細個已經「臭脾氣」，全靠母親要他做運動「放電」，令他脾氣盡消，更笑言鍾情打網球全因為「好有型」！
Eason昨日以「香港網球總會推廣大使」身份出席「賽馬會樂動網球計劃」記者會，經常打網球的他，當然親自落場與小朋友切磋，雖然身水身汗，但球來球往打得相當投入。他分享打網球歷程：「細個因為住政府宿舍，所以落樓下打波仲係免費嘅，7歲就接觸網球，令我學識面對輸贏，我細個出名脾氣好差，可能係孻仔畀人寵壞，但老實講我就冇試過將球拍掟爛嘅，我懷疑啲球員有贊助，唔使錢可以打爛佢，但我就要自己錢買，我第一支球拍係石墨拍，依家都有Keep住。」
唔贊成掟球拍
Eason又稱打網球可以培養好脾氣：「如果唔好脾氣，打波係發揮唔到最好，要學識沉住氣，發脾氣係冇用，但每個人都有脾氣，有啲人嗌啦，我最唔主張係掟拍，有機會傷到自己添，所以做運動對自己脾氣係好好嘅訓練。」
學費達拿瀟灑
由於熱愛網球，在烈日當空下都要好集中才打得好，愈專業就愈有要求，就如他的偶像「網球天王」費達拿：「佢後生嗰時脾氣好差嘅，但依家可以咁瀟灑，個個都係佢粉絲，都係球場上練番嚟嘅涵養。」他稱喜歡打網球最重要原因是「好型」，亦主張小時候就應該開始學打波，更自爆是母親知道他脾氣差，要他多做運動：「佢話基本上做完運動，你就冇力去發脾氣，的確真係咩脾氣都冇晒，所以係好好抒發情緒嘅方法。」