連詩雅孖陳嘉莉掃情趣內衣
歌手連詩雅（Shiga）日前撇低「音樂才子」男友徐浩，陪甩拖的陳嘉莉齊齊熱褲晒長腿「孖咇」Shopping，兩人變身「買嘢精」專攻性感底底和水着，Shiga即場試身激晒「零肥肉」蛇腰。
Shiga近月忙個不停，上月才從韓國拍攝節目返港，連拍拖時間亦欠奉，但日前記者發現她約埋陳嘉莉（Kelly）在銅鑼灣行街，兩人因拍攝正在Netflix播放的劇集《性敢中環》演閨蜜而變成真朋友，就連打扮都變孖公仔，以熱褲和短Boots夏娃裝束招搖過市，加上兩雙42吋白滑長腿，施展「吸睛大法」。
期間兩人走進一間泳衣店，Kelly似乎對紅色比堅尼幾有興趣，Shiga有幫眼畀意見，不過，Shiga一心二用，自己亦睇中一件花花low-cut款式，極速入去試身，換上後，毫不避忌行出來給Kelly「過目」，Shiga激現「零脂肪」纖腰，更叫Kelly替她用手機拍照再研究效果，最終Shiga扑槌購買。
Kelly冇斬獲
之後兩女好快又轉到內衣店血拼，她們鍾情喱士款式，有拖拍的Shiga選內衣自然以「情趣」款式為主，Kelly拎起紅色Lace Bra拼上Shiga身上，Shiga亦襯埋同款Lace底底。兩人又睇中白色吊帶性感睡裙，齊齊在鏡前左照右照，莫非想扮「純純兔」？十多分鐘後，Shiga拎住兩袋戰利品一臉滿足離開，Kelly雖然兩手空空，但見到Shiga有斬獲原來都一樣好治愈，兩人意猶未盡，沿路繼續血拼。
