靚聲姚子羚李凱盈聲演三級片：要好用力！
平面模特兒出身的「靚聲姚子羚」李凱盈（Chara），有演出電影、電視劇及舞台劇經驗，談到入行經過，她坦言是誤打誤撞︰「無意間接觸咗私影，當時我仲覺得好得意，點解影完佢會畀錢我呢？因為通常聽嘅都係收錢影相，嗰次我就當係賺外快。之後開始接觸電視劇，由臨記開始，拍過5套左右，然後又拍電影，開始鍾意幕前工作。」並坦言最喜歡演舞台劇︰「需要更多嘅臨場技巧，同埋可以即刻見到觀眾反應，好真實、好開心！但真係需要一段時間練習，試過因為好大壓力，唔記得台詞而喊。」
進修做多功能藝人
自細鍾意睇卡通片的Chara，長大後因興趣而上配音堂，發掘「分身」︰「每一堂老師都會畀唔同嘅片段去試，最難忘係最後嗰堂要配三級片，原來係好難！雖然都係得啲聲音，但你要好用力咁去配音，配完其實好攰！（之後有冇嘗試為三級片配音？）暫時未有，但之前試過配《捉妖記》，算係踏出好微小嘅一步，配妖怪、小男孩，呢啲角色嘅發展空間較大。」問到是否想朝配音員方向進發？她坦言單一發展較輸蝕，希望能做多功能藝人︰「最近仲學埋剪接，覺得好好玩，平時都有做開KOL方面嘅工作，會拍吓啲Vlog，自覺影相唔足夠，想去學剪接。」
膽生毛唔識驚
踏入娛圈前，Chara曾任職旅遊顧問，主要為顧客提供行程、交通及住宿意見。講到旅遊經驗，膽生毛的她自爆試過跟陌生人去酒吧飲酒︰「喺日本如果見你係單身女仔，好多人都會撩你去飲嘢，或者話車你，我就會用唔識日文嚟推。但試過有人撩我去酒吧，諗住未去過就去吓啦，可能當時得廿幾歲，大膽啲。」
PROFILE
三圍︰32B、24、34
身高︰1米65
體重︰47kg
職業︰Freelance Model、演員