廣告女王李莉靠姊妹「解決」示愛禮物
在ViuTV選秀節目《廣告女王》奪冠的李莉（Lily）是田徑教練，曾擔任體育節目主持的她一直熱愛運動，至今仍有繼續跑及教班，她說：「之前仲去過小學代體育課，幾有趣。」Lily身形健美，自爆為食不戒口，至愛飲汽水、食雪糕：「食啲嘢都好唔健康，好彩運動量夠，本身又唔易肥。」她略嫌身形偏瘦，希望練出肌肉線條！
風頭躉唔會收兵
運動強人Lily當年是學校的風頭躉，她自言性格怕醜，很少跟男同學玩：「我唔會收兵，以前冇咩呢樣嘢，可能都會有暗戀，送吓小禮物。」讀中六、七時，學校辦聖誕聯歡派對，平安夜生日的她憶述獲鄰班男同學送上親手炮製的蛋糕，打開時非常尷尬：「因為個蛋糕上面有好多心心，班女同學係咁笑，因為唔知點處置，就叫大家幫手一齊食咗佢。當時係好感動，但我冇接受佢，唔啱無謂夾硬嚟。」
她坦言當選「廣告女王」後工作量增多，除了體育方面的工作，接了幾個廣告及有機會參演電影，她說：「都開心o架，無論咩角色都唔重要，最緊要有機會。我都好有興趣拍戲，中學時玩過話劇，細個又拍過教育電視。」她曾報讀短期演藝課程，但因忙於參選致出席率不足，打算再次報讀。
Profile
年齡：27歲
三圍：32B、23、33
身高：1米68