感情冇着落 唐詩詠爆阿爸擔心
藝人唐詩詠昨晨出席《仁濟安老送關懷》活動，表示有做探訪跟老人家傾偈，她說：「佢哋會叫我食多啲。（問你感情事？）又冇喎，但佢哋會畀啲意見，例如要揀咩男仔，又話唔好嗌交，要包容，最緊要心地好、孝順。」她笑言家人也不敢問她感情事：「爸爸少出聲，要等我話畀佢聽，阿哥就話阿爸擔心，但唔敢講。（你自己都唔敢講？）好少，怕佢哋擔心。（帶個男仔返去就唔使講？）結婚先帶，費事佢哋開心完又唔開心。」
提到之前被影到與緋聞男友「教育界王力宏」陳思銘逛超市及被指築愛巢，她否認拍拖：「張相係冬天影，講咗好多次，真係朋友。畀啲時間空間我哋，個個喺我身邊出現就係男友嘅話好大壓力，連食餐飯都唔敢。」至於另一緋聞男友馬國明？她笑說：「啲人成日問我點解唔約佢去街，唔好咁投入套劇。（佢仲有機會？）可能我唔啱佢呢。（識得太耐？）冇諗過。」另外，詩詠在社交平台上載被大狗「強吻」的合照，搞笑留言：「唔知想食我定錫我。」
