李璧琦冧咀老公畀足130分
藝人李璧琦（Becky）與圈外男友蘇銘熙（Adrian）昨日拉埋天窗，Becky畀足老公130分，Adrian則大讚太太是最好的！新娘子坦言今年3月才決定結婚，整個婚禮可謂「Mission Impossible」，完成任務後要先享受二人世界，生兒育女再從長計議。
李璧琦與拍拖5年的圈外男友Adrian，在香港浸信教會舉行婚禮，行禮前，身穿珍珠色低胸禮服的Becky，與Adrian切蛋糕及合巹交杯，其後在徇眾要求下錫錫，甜到漏！不少圈中好友到賀，包括陸浩明、陳智燊夫婦、李亞男等。
未有生B大計
Becky表示心情興奮又開心，婚禮採用基督教形式，沒有接新娘及玩新郎環節，她說：「難得家人飛嚟香港，我哋利用啲時間去影全家福，哥哥話對上一次影已經係21年前。」問到前一晚有否興奮到失眠？她說：「尋晚瞓咗幾個鐘，我要記熟誓詞，發夢都係誓詞。（宣讀誓詞會唔會喊？）我件婚紗有袋，袋定紙巾，不過冇準備貓紙，都驚會忘記講咩。（誓詞諗咗好耐？）一直相處都有個草稿。（成個婚禮準備咗幾耐？）3月決定結婚，4月影相，5月公布，大家都覺得係Mission Impossible。」問到給老公多少分？Becky冧爆說：「如果100分滿分，我會畀佢130分，因為我只有70分，佢補足我，我哋夾埋係200分。」Adrian則大讚太太：「佢好好，最好係佢。」談及生B大計與蜜月，二人表示稍後再計劃，婚後會先過二人世界。
唔慣做「蘇太」
其後Becky換上另一套婚紗，在兄長陪同下步入教堂行禮，並以唱歌形式把誓詞唱出來，當答謝雙方家長時，更一度感觸落淚。禮成後，她坦言不習慣被叫「蘇太」，又表示有信心做個滿分太太。
