麥皓兒挑戰做「兒歌天后」

藝人麥皓兒（Joey）雖然活躍於電視圈，但未有放棄音樂夢想，繼早年推出「洗腦兒歌」《請你食麵》及去年夥拍師傅吳天偉舉行音樂會，最近再次重返兒歌界，為主題樂園獻Sing，還首次與200位小朋友共同錄製歌曲，誓要挑戰做「兒歌天后」！她透露今次再度與吳天偉拍住上：「呢幾年我都有做唱歌導師，嗰200位小朋友都係我哋嘅學生，所以想趁呢個機會畀佢哋體驗一下。雖然我未有小朋友，但都視學生為仔仔女女，希望佢哋透過學唱歌，領會更多做人嘅道理。」又指正積極籌備流行曲，自爆曾於網上拍片翻唱歌曲，獲原唱歌手鄭融留言支持，對她可謂一大鼓舞。