歐陽震華再拍劇𢱑群姐續三世緣

Bobby講嘢一貫笑爆嘴，自嘲「野仔」唔知醜。

歐陽震華（Bobby）昨日出席活動，揚言10月會重返無綫拍警匪劇，又自爆並非無綫「親生仔」：「係野仔！今次返去拍劇都好期待，有一段時間冇做警察再發揮。」並透露拍檔有萬綺雯、陳瀅、楊明及馬德鐘，唯獨忘記最後一位女主角，問到是否群姐？他大笑說：「都好喎！可以同公司提議擺群姐落去，可能群姐同萬綺雯爭我，我咩都知，就係唔知醜！」

• Bobby與群姐在《愛·回家》擦出火花，僅兩集已令不少觀眾回味。

驚熱到中暑

講到客串兩集《愛·回家之開心速遞》好評如潮，更有網民大讚好睇過台慶劇，Bobby謙稱：「唔好咁講，少食多滋味，啲人話我好演技，其實現場我要係咁忍笑，次次同群姐情深款款對望，側邊啲人都會喺度笑。古裝靚嘅定義，可能係群姐呢啲先靚，楊貴妃都係肥，愈肥愈好！」問有否參與編劇？他搖頭說：「有咁大嘅編劇團隊，如果寫現實劇情就夾硬，講前三世就任寫，避開刻意、猥瑣就得。（再拍？）要睇經理人公司放唔放人！天熱驚中暑！嗰日未適應到開工，又要黐頭套拍通宵，好辛苦！但都唔排除有呢個可能，吊吓大家癮先！」

此外，對於被指跟太太去海味店買補品，他抵死說：「一個月食幾十萬冬蟲草，當飯食咩？我係去買煲湯材料，話我買冬蟲草、血燕，我連血燕都未見過，養生靠生活正常、飲食定時、睡眠充足。（話你瑤柱當零食？）梗係講笑，老人家教落，買瑤柱要試少少，睇吓有冇渣。」但他承認小時候很富貴，口痕就以瑤柱、蝦米做零食，又指若轉行會去賣海味。